မိုးကုတ် ဆရာတော်ကြီး၏ ဓာတ်တော် မွေတော်များ လှည့်လည် အပူဇော်ခံမည် ..

ကျေးဇူးတော်ရှင် အဂ္ဂမဟာ ပဏ္ဍိတ မိုးကုတ် ဆရာတော် ကြီး၏မီးမခဘဲ ကြွင်းကျန်ခဲ့သော မျက်လုံးတော်၊ ဓာတ်တော်၊ မွေတော်များအား ရန်ကုန်မြို့တွင် လှည့်လည် အပူဇော်ခံမည် ဖြစ်ကြောင်း သိရသည်။ ဓာတ်တော် ၊ မွေတော် များအား အောက်တိုဘာ ၂၉ ရက်မှ နိုဝင်ဘာ ၂ဝ ရက်အထိ မိုးကုတ်မြို့မှ ရန်ကုန်မြို့ရှိ မိုးကုတ် ဝိပဿနာ အဖွဲ့ချုပ်သို့ ပင့်ဆောင် အပူဇော် ခံခြင်းကို ဆောင်ရွက်သွားမည် ဖြစ်သည်။ အစီအစဉ်ကို မိုးကုတ် ဝိပဿနာ တရားစဉ်နှင့် လုပ်ငန်းစဉ် ပြန့်ပွားရေး အဖွဲ့ချုပ်၏ နှစ်(၅ဝ)ပြည့် ရွှေရတု အထိမ်း အမှတ်အဖြစ် ကျင်းပခြင်း ဖြစ်ပြီး ရွှေရတု အခမ်းအနား ကြီးကို နိုဝင်ဘာ ၁၅ ရက်မှ ၁၇ ရက်အထိ ကျင်းပမည် ဖြစ်ကြောင်း သိရသည်။

ပင့်ဆောင်မည့် လမ်းကြောင်းမှာ ထောက်ကြန့် သပြေညို ခန်းမရှေ့မှ မင်္ဂလာဒုံ- စော်ဘွားကြီးကုန်း၊ မရမ်းကုန်း လမ်းဆုံ၊ ကမ္ဘာအေး ဘုရားလမ်း၊ ဆီဒိုးနား ဟိုတယ်၊ စက်မှု (၁)လမ်း၊ ဦးချစ်မောင်လမ်း၊တာမွေလမ်းဆုံ၊ သမိန် ဗရမ်းလမ်း၊ တာမွေကျောက်မြောင်း မီးပွိုင့်၊ အလုပ်သမား ဆေးရုံရှေ့လမ်း၊ ကန်ပတ်လမ်း (နတ်မောက်လမ်း) နှင့် ဗိုလ်ချုပ်ကြေးရုပ်၊ မိုးကုတ် အဖွဲ့ချုပ်သို့ ပင့်ဆောင် လာမည်ဟုသိရသည်။ ဆရာတော် ကြီး၏ ဓာတ်တော်၊ မွေတော် များကို မိုးကုတ် ဝိပဿနာ အဖွဲ့ချုပ်ရှိ ပိဋကတ်တိုက် စံကျောင်းတော် အတွင်း ကိန်းဝပ် စံပယ်တော် မူပြီး အခမ်း အနားဖြင့် ဖွင့်လှစ် အပူဇော် ခံမည်ဖြစ်ကြောင်း သိရသည်။